Torsdag vart det klart at Dagens Næringsliv har innvilga sluttpakke til 26 tilsette etter at avisa må kutta 23 millionar kroner i personalkostnadar.
Blant dei som sluttar er journalist Jostein Løvås, som har jobba på DN sitt Stavanger-kontor dei siste seks åra.
– Det har ikkje vorte lagt press på dei tilsette ved lokalkontora for å få dei til å slutta, snarare tvert om. Eg har sjølv likevel teke sluttpakke av andre grunnar. Nett no har eg ein klump i halsen, seier Løvås til Medier24.
– Eg har hatt femten flotte år i DN, i Oslo, New York og Stavanger. Denne tida er allereie sveipt i DN-rosa sukkerspinn, slik minnet har det med å gjera, held han fram.
Dagens Næringsliv har per i dag lokalkontor i Kristiansand, Stavanger, Tromsø og Phuket. Ingen av dei andre korrespondentane har søkt sluttpakke, etter det Medier24 kjenner til.
Den andre av dei to Stavanger-baserte journalistane, Morten Ånestad, held fram på lokalkontoret.
– DN er i trøbbel no
Det siste dryge halvåret har Dagens Næringsliv gått gjennom ein omfattande omstruktureringsprosess, og førre veka vart ei splitter ny redaktør- og leiargruppe presentert.
I tillegg er deira gamle avisstruktur erstatta ved at det er oppretta fire nye avdelingar i redaksjonen.
Løvås ynskjer ikkje å utdjupa kvifor han no har vald å søkja sluttpakke, men seier til Medier24 i ein kommentar:
– Eg har ikkje lyst til å meina så mykje om problema DN står oppe i, eller stå fram som ein bitter besserwisser. Det er eg ikkje. Eg har hatt femten til dels fantastiske år i bladet, og er takksam for alle sjansane eg har fått. Tida som korrespondent i New York ragar høgast, seier Løvås til Medier24.
– DN er i trøbbel no, men det er ikkje rettvist å peika ut syndebukkar. Heile mediebransjen er i omvelting, krisa kom kanskje berre nokre år seinare til oss.
– Kva skal du no?
– Me får sjå.
Det har ikkje lukkast Medier24 å få ein kommentar frå sjefredaktør og administrerande direktør Amund Djuve i Dagens Næringsliv.
Mistar profilerte journalistar
Løvås har studert journalistikk i Oslo, og starta sin karriere i Finansavisen i 1999, kor han vart vaktsjef.
Han har sidan 2004 jobba i DN, først i Oslo som olje- og energireporter. I 2006 flytta han til Stavanger, og i perioden 2009-2013 var han USA-korrespondent i fleire omgangar, til saman i tre år. Sidan har han vore i Stavanger.
Medier24 skreiv tysdag at annonsedirektør Erik Eckbo, D2-sjef Helle Vaagland, videojournalist Marte Christensen, Magasinet-journalist Cecilie Enger og journalist Åsne Haugli alle har fått sluttpakke i DN. Også sjef for content-avdelinga DNX, Siri Skaalmo, sluttar i avisa, melde DN sjølv fredag.
