Driver redaksjonen alene: – Mantraet mitt har alltid vore å løysa ting enklast mogleg

I spalten Julepraten stiller Medier24 spørsmål til en rekke mennesker i mediebransjen.

I dag står Hardanger.no-redaktør Ingvil Aaen Torpe for tur.

– Hva gjør du i julen?

– I jula tek eg mest mogleg fri og brukar tida med familie og vener. Eg håpar å få stått litt på ski og elles ha tid til å lesa bøker (som eg forhåpentlegvis har fått i julepresang), sjå julefilmar med ungane og koma i mål med eit strikkeprosjekt som har blitt liggande heile hausten.

– Hva sjokkerte/overrasket deg mest i bransjen i året som gikk?

– Vanskeleg spørsmål! Det er nesten ingenting som sjokkerer meg lenger. Men viss eg skal fokusera på ei positiv overrasking for min eigen del, må det vera at det har vist seg at det er plass til fleire i mediemangfaldet i Hardanger. Sidan me starta opp Hardanger.no 1. august i år, har me vakse jamt og trutt gjennom heile hausten og dei siste vekene fått rundt 100 nye lesarar kvar veke. Ein slik vekst turde eg ikkje håpa på i starten, men det viser at me har treft eit behov mellom den klassiske lokalavisa og større regionmedium.

– Hva er du/din redaksjon mest stolt av i år?

– Eg er så langt einaste redaksjonelle ressurs i Hardanger.no så det eg er mest stolt av i tillegg til veksten eg nemnde over, er vel at eg har greidd å produsera såpass mykje variert innhald heilt på eiga hand innanfor normal arbeidstid. Sjølv om eg har erfaring frå både avis og TV tidlegare, har eg stort sett jobba i team eller vore meir bak i kulissane og prøvd å spela andre gode. Podkastserien Hardangerfolk var min debut som podkastvert og er kanskje det eg både er mest overraska og stolt over at eg kasta meg ut i utan å ha tilgang på studio og profesjonelt opptaksutstyr. Mantraet mitt har alltid vore å løysa ting enklast mogleg, og her har eg bevist at det faktisk er mogleg og ikkje berre noko sjefar seier når dei skal spara pengar.

– Hva er de største utfordringene bransjen står i nå?

– Nordmenn har heldigvis høg tillit til norsk media, men det er lite som skal til for å riva tilliten ned. Derfor treng bransjen skarpe journalistar og gode fagfolk som greier å forvalta tilliten på ein god måte. Det er viktig at politikarane forstår verdien av ei fri og uavhengig presse og støttar tiltak som gjev eit breitt mediemangfald. Når kanalane publikum hentar innhaldet sitt frå blir meir og meir fragmenterte, er det viktigare enn nokon gong at både mediebransjen, politkarar og utdanningsinstitusjonar støttar kvarandre i arbeidet med å gjera folk medvitne på kjeldekritikk og ekkokammer.

– Hvordan har KI endret hverdagen din?

– KI har blitt eit naturleg verktøy i arbeidskvardagen. Eg sparar mykje tid på å bruka KI til å gå gjennom lange rapportar og dokument, eller koma med forslag til titlar og forenklingar i tekst. Det er nok mange som har kome mykje lenger enn meg i bruk av KI, men eg prøver å henga med på utviklinga så godt eg kan og finna dei områda eg kan dra nytte av verktøyet på best mogleg måte.

– Hva er ditt beste råd til dine yrkeskollegaer?

– Sørg for at du løftar blikket av og til! Det handlar om å sjå dei du har rundt deg og høyra på det dei har å koma med, men òg å sjå ut over eigen redaksjon og mediekonsern (og for så vidt norsk mediebransje også). Og gløym aldri kven du faktisk lagar innhaldet for, dei må du også lytta til.

Ingvil Aaen Torpe blir redaktør for ny satsing i Hardanger

Ingvil Aaen Torpe går av som redaktør i Hordaland