Ukeavisen Ledelse byter namn. Fredag kom første utgåve av Dagens Perspektiv

– Det er alltid dramatikk i namneendring. Eg har fronta merkenamnet Ukeavisen LEDELSE i 15 år, og det er det folk kjenner. Men eg trur folk kjem til å få det med seg.

Det seier ansvarleg redaktør i Dagens Perspektiv og eineaksjonær i eigarselskapet Medier og Ledelse, Magne Lerø, til Medier24.

I 2019 endrar nemleg Ukeavisen LEDELSE namn til Dagens Perspektiv, som har vore namnet på nettavisa deira dei siste åra.

– Me starta den digitale dagsavisa Dagens Perspektiv for fire år sidan, og så fekk me pressestøtte etter halvanna år. Då låg det i korta at det var mykje å handtere, og me hadde altfor mange merkenamn. No konsentrere me oss Dagens Perspektiv, seier Lerø til Medier24.

Trappar opp helsesatsinga

No vil han samle både tidlegare Ukeavisen LEDELSE og magasinet Velferd under same paraply for å få meir i pressestøtte. Nøyaktig eitt år etter at Medier og Ledelse overtok Velferd, legg han altså ned magasinet som for første gang vart gjeven ut i 1912 (under namnet Sykeforsikringsbladet).

– Modellen de har hatt med mange ulike merkenamn kan ha vore forvirrande?

– Det har vore forvirrande. Mange har meint det, seier Lerø.

– No integrerer me velferd- og helsestoffet inn i vekeavisa. Velferd er eit veldig spesielt magasin, og handlar om kva Nav brukar pengane på. Heile velferdssamfunnet går gjennom Nav, og den største posten på statsbudsjettet går til velferd – og helse, som me no har utvida til. Det som skjer av helse på kommunenivå er underdekka, seier Lerø. Det vil dei no gjere noko med.

– Me har drive med Ukeavisen Ledelse i 15 år, men det namnet forsvinn etter kvart. Det har vore ein plan over lang tid, men det var ikkje før i haust at me bestemte oss for når me skulle gjennomføre det, legg Lerø til.

Tapte pengar i 2017

Konsernselskapet Medier og Ledelse hadde i 2017 ein omsetnad på drygt 30 millionar kroner, og fekk ein EBITDA på 2,2 millionar kroner. Dotterselskapet Dagens Perspektiv, som til no har gitt ut Ukeavisen LEDELSE, magasina Plot og Velferd, hadde ein omsetnad på 16,6 millionar kroner og ein EBITDA på minus 1,4 millionar kroner.

Medier og Ledelse AS gir elles ut Dagligvarehandelen og bransjeavisa KBS.

– Ein må sjå resultatet til Dagens Perspektiv i samanheng med konsernselskapet Medier og Ledelse. Målet er at konsernet går ein million i plus. Det me går i minus på er Plot, fordi det følgjer med dersom ein berre betalar for Dagens Perspektiv. Eg er ikkje oppteken av korleis dei ulike selskapa gjer det resultatmessig.

– Korleis gjekk 2018?

– Eg trur det vert ein pluss på til saman over ein million. Då er me der me skal vere, seier Lerø.

Opplagsvekst i 2017

– Omlegginga vil bety betydelege kostnadskutt?

– Det ligg kostnadskutt i å ikkje lenger produsere magasinet Velferd. Det kostar mykje pengar. Me brukar mindre ressursar på papir, og meir ressursar på innhald. Me effektiviserer ved å leggje velferd- og helsestoffet inn i vekeavisa, seier Lerø.

– Vil det endre dykkar redaksjonelle prioriteringar?

– Nei, eigentleg ikkje. Det inneber at me får meir ressursar til Dagens Perspektiv, som vert utvida til 48 sider.

Med eit samla opplag på 4.296 i 2017 – opp frå 4.144 i 2016 – fekk Dagens Perspektiv ein opplagsvekst for første gang sidan 2009, som i stor grad vart forårsaka av digital vekst.

– I 2018 klarar me ikkje meir enn å halda stillinga. Men me får sjå korleis det endeleg slår ut. Det er ein kamp om å veksa. Det er ikkje enkelt. Det er mange om beinet, seier Lerø.

– Dette er framtida

Den røynde medieleiaren meiner Dagens Perspektiv nyttar framtidas modell, og at fleire større aktørar vil gå gjennom ei omlegging til liknande modellar seinare.

– Me har endra namn gradvis. Me er to ting. Ingen har den modellen som me har – og eg meiner det er framtidas modell. Det kjem ikkje til å vere så mange dagsaviser på papir lenger. Me er ei digital dagsavis med om lag 15 saker kvar dag, og så samlar me det beste, bearbeider det litt og så gir me det ut i ei papiravis.

– Mange dagsaviser vil slite med å få ut papirutgåva. Merkenamna me har i dag vil eksistere i form av ei utgiving kvar veke, trur Lerø.