VG-brenning gav klikkrekord – og Natt og Dag-redaktøren fnyser av kritikken
– Vidar Kvalshaug forstår ikkje satire, seier konstituert Natt og Dag-redaktør Ida Wammer. Måndag har biletserien med Per Sandberg og Bahareh Letnes over 180.000 visingar.
Norsk offentlegheit ante fred og ingen fare då ein avisbrennande og hijabkledd Per Sandberg, med kjærasten Bahareh Letnes, plutseleg dukka opp i ein mildt sagt sjokkerande Natt og Dag-biletserie laurdag kveld.
Saka spreidde seg fort, og allereie første kveld hadde den over 70.000 sidevisingar, ifølgje N&D-redaktør Ida Wammer. Måndag morgon er det over 180.000 som har vore inne i saka.
– Heilt rått
– Denne avisa er jo «Årets beste»-utgåva. Då spurte me oss om «kven er 2018?» Det er jo Per og Bahareh, som har vore i media sitt søkjelys det siste halvåret. Då tenkte me at me hadde lyst til å ha dei på framsida. Me tenkte på kva situasjonar me ville putte dei i, seier Wammer til Medier24.
Då dei først oppretta kontakt med Sandberg, var tilbakemeldinga at han skulle på reis to dagar etter. Då vart det shoot allereie dagen etter.
Fersk Natt og Dag-redaktør Ida Wammer.Privat
– Kva tenkte de då de såg resultatet i ettertid?
– Me vart kjempeglade. Det er heilt rått at dei ville bli med på dette. Det har jo sett fyr på internett, og med Vidar Kvalshaug som ikkje forstår satire er dette blitt akkurat det Natt og Dag har lyst til å vere.
– Ja, kva seier du til kritikken som kjem frå nettopp Vidar Kvalshaug?
– Som eg sa, han forstår ikkje satire. Dette inngår i ein biletserie der Per og Bahareh «dabbar», drikk pet-at og brenn ei avis. Ved å brenne avisa gjer me narr av mediene si dekning av situasjonen, samstundes som me ironiserer over korleis dei har iscenesett seg sjølv. Me har stått på sidelinja, observert og kost oss. Det går begge vegar, seier ho.
Til Medier24 svarar Kvalshaug:
– Heller humørlaus enn historielaus. Eg har ikkje kritisert Natt og Dag for å ha fått til desse bileta. Dei er ei frisk og fin publikasjon, og dette er heilt i deira ånd. Slike bilete blir ikkje til utan medverking. Eg har kritisert Per Sandberg for å ha stilt opp med lighter og sett fyr på ei avis.
Bahareh Letnes poserer som friheitsgudinna, med eit brennande VG som fakkel.Torjus Berglid/Natt og Dag
Sandberg nølte
Ho var ikkje overraska over at det kom negative reaksjonar.
– Det er jo norsk offentlegheit, så me hadde venta reaksjonar. Me vart akkurat ikkje lei oss for det. Me står 100 prosent inne for det, seier ho vidare.
Wammer fortel at den tidlegare fiskeriministeren ikkje var vanskeleg å få med, men at han var nølande til avisbrenninga.
– Eg trur dei tykkjer det var veldig gøy. På avisbrenninga var han litt nølande, men Bahareh var med.
Per Sandberg stadfestar overfor Medier24 at han var usikker på avisbrenninga.
– Litt betre enn venta
I Natt og Dag-saka står det «Vi inviterte dem til et fotostudio og ga dem sjansen til å kommentere hysteriet.»
– Er det Sandberg og Letnes som «kommenterer hysteriet», om det er Natt og Dag som har iscenesett alle bileta?
– Me hadde ein god dialog rundt dette. Me hadde dei ulike ideane, og dei tok det til sitt eige. At dei valte å gjennomføre det, gjer at det er deira kommentarar til saka, seier Wammer.
Natt og Dag-redaktøren fortel at saka er blitt den mest leste i Natt og Dag si historie – på berre to dagar. Og det skjer i Wammer si første utgåve som redaktør, etter at ho tok over for Daniel Ramberg som forlét N&D til fordel for stillinga som musikksjef i P3.
– Me tenkte den ville gå bra, men det har gått litt over det me hadde venta.
